Бөрлі ауданындағы «Глобус» театры өнегелі қойылымдармен аудан жұртшылығын қуантып жүр. Бір жыл бұрын ашылған тетр шәкірттері болашақта қазақ өнерінің өркендетуге үлес қоссам екен дейді.

Өнер саласы ішінде театрдың орны қашан да бөлек. Көрермен көңілін нұрға, жүрегін жырға бөлейтін де, қоғамның рухына дем, ішкі жан дүниесіне ем болатын да – театр сахнасы.Осыны ескерген «Глобус» театры алғашқы мерейтойларына орай, екі күн көрерменімен қауышты. Ешкімге ұқсамайтын өнер ұжымының бағыты, стилі да өзгеше. Дегенмен басты мақсат оқуыларды актерлық шеберлікке баулып, өнерге таласы бар шәкірттерді көптеп шығару. Жас ерекшелігі 5 пен 17 жас шамасындағы шәкірттер әр бір рольге жауапкершілікпен қарап, түрлі жанрдағы қойылымдарды шебер орындайды. Олар қазақ өнерін өркендетіп, сахнаның сырбазына айналуды мақсат етеді.Театр ұжымы көрерменге плагиат қойылымдар емес, тек көркемдік жетекшінің авторлық туындыларын ұсынады. Сондықтан әр туынды көрушінің жүрегінен орын алып, бірде күлдіртеді, бірде жылатады. Ал мерейтойлық қойылымның жөні тіптен бөлек. Көрермен композициялық қойылым, КТК, пантомима жанрларынан қойылымдар көріп, әсем ән мен ырғақты би тамашалады. Тіпті Қазақ эстрадасының жарық жұлдыздарының құттықтауы да болды. Өнер ұжымы өз көрермендеріне «Бағдаршам» мюзикл концерт қойып, «Глобус» балымен қорытындылады. Театр жетістіктері аз емес. Өткен жылы Бурабай өлкесінде өткен республикалық «Ақ желең» байқауында топ жарды. Өнер қырандары желісі бойынша өзгертіліп жазылған «Періште пейіште» қойылымы көпшілікті тәнті етті. Бүгінде тұрақты көрермені бар өнер ұжымының арманы асқақ.